Rusiyanın Volqoqrad şəhəri iyulun 27-nə keçən gecə raket hücumuna məruz qalıb.
Azinformasiya.az “UNİAN”-a istinadən xəbər verir ki, yerli sakinlər şəhərdə güclü partlayış səslərinin eşidildiyini və zərbələrdən sonra yanğının baş verdiyini bildiriblər.
OSINT analitiklərinin məlumatına əsasən, hücumun hədəfi Rusiyanın hərbi-sənaye kompleksinin əsas müəssisələrindən biri olan “Titan-Barikadı” zavodu olub. Bildirilir ki, həmin müəssisədə “İsgəndər-M”, “Topol-M” və “Yars” raket kompleksləri istehsal edilir.
Sosial şəbəkələrdə hücum zamanı raketin uçuşunu əks etdirdiyi iddia olunan videogörüntülər yayılıb. ASTRA nəşrinin məlumatına görə, zərbələr, ehtimal ki, Ukraynanın uzaqmənzilli “Flaminqo” qanadlı raketləri ilə endirilib. Lakin bu məlumat rəsmi mənbələr tərəfindən təsdiqlənməyib.
Volqoqrad vilayətinin qubernatoru Andrey Boçarov gecə saatlarında Ukrayna raketlərinin Volqoqrada hücum etdiyini təsdiqləyib. Onun sözlərinə əsasən, şəhərin Krasnooktyabr rayonunda yerləşən sənaye müəssisələrindən birinin istehsal obyektlərinə ziyan dəyib.
“İlkin məlumata əsasən, hadisə nəticəsində 10 nəfər xəsarət alıb”, – deyə qubernator bildirib.
Qeyd edək ki, “Titan-Barikadı” zavodu da məhz Volqoqradın Krasnooktyabr rayonunda yerləşir.
Azinformasiya.az