Azərbaycan Respublikasında 29 yanvar 2025-ci il tarixinə təyin edilmiş bələdiyyə seçkilərinə az vaxt qalıb. Təşviqat mərhələsi isə davam etməkdədir. Yeni Azərbaycan Partiyasının (YAP) Qaraçuxur bələdiyyəsi üzvlüyünə namizədləri təşviqat kampaniyası çərçivəsində növbəti səyyar görüşlərini keçiriblər.
Azinformasiya.az Qaraçuxur qəsəbəsində yerləşən “Neftçilər” parkında qəsəbə ağsaqqalları və Qaraçuxur qəsəbəsi Zaur Şərifov küçəsi 26 ünvanında sakinlərlə baş tutan görüşlərdə Qaraçuxur bələdiyyəsinin sədri, YAP-ın Qaraçuxur bələdiyyəsi üzvlüyünə namizədi İxdiyar Nəcəfov, Arif Şahmuradov, Mirvari Quliyeva, Rəşad Rzayev və İlham Mirzəyev iştirak ediblər.
Qəsəbə ağsaqqallarını, sakinləri salamlayan, görüşdə iştiraka gəldikləri üçün onlara təşəkkür edən İxdiyar Nəcəfov bildirib ki, Ulu Öndər Heydər Əliyev tərəfindən yaradılan bələdiyyələr bu gün ölkə prezidenti Cənab İlham Əliyevin və Birinci Vitse-Prezident Mehriban xanım Əliyevanın rəhbərliyi altında geniş qayğı ilə əhatə olunub. İxdiyar Nəcəfov çıxışını Qaraçuxur bələdiyyəsinin ötən illər ərzində gördüyü işlər barədə hesabat verməklə davam etdirib. Onun sözlərinə görə, bələdiyyələr yerli özünüidarəetmə orqanı olduğu üçün onların büdcəsi əsasən əhalidən yığılan yerli vergilər və rüsumlardan formalaşır. Qaraçuxur bələdiyyəsi də öz növbəsində ötən illər ərzində bir sıra tədbirlər, eyni zamanda qəsəbə ərazisində yenidənqurma, parklarda təmizlik, abadlıq, yaşıllaşdırma, məhəllədaxili yollarda asfaltlanma və quruculuq işləri aparmışdır.
Bələdiyyə sədri qeyd edib ki, Qaraçuxur bələdiyyəsinin balansında olan “Vətən şəhidləri unudulmur” abidə parkında gündəlik mütəmadi olaraq təmizlik işləri aparılır, 145 ədəd müxtəlif növ ağac və 1500 kvadrat metrlik yaşlllıq sahəsi suvarılır. Eyni zamanda, Qaraçuxur qəsəbəsində yerləşən “Veteranlar xiyabanı”, “Şəhidlər bulağı” kompleksi, Yeni Günəşlidə yerləşən “Ana bala” və “D” parklarında da müntəzəm olaraq abadlıq işləri həyata keçirilir, quruyan ağacların əvəzinə yenisi əkilir.
İxdiyar Nəcəfov onu da vurğulayıb ki, ötən il Azərbaycanın ev sahibliyi etdiyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası – COP29 tədbiri çərçivəsində Qaraçuxur qəsəbəsi, Aşıq Pəri küçəsində Qaraçuxur bələdiyyəsi tərəfindən 1000-ə qədər şam ağacı əkilmişdir. Bununla yanaşı, qəsəbə ərazisində bir sıra məhəllədaxili yollarda asfalt işləri görülmüş və məişət tullantılarının vaxtında yığışdırılması təmin edilmişdir. Qaraçuxur bələdiyyəsi sosial-humanitar tədbirlər çərçivəsində qəsəbədə yaşayan şəhid ailələrinə, aztəminatlı ailələrə, kimsəsizlərə, qocalara, xəstələrə, valideyn himayəsindən məhrum olan uşaqlara maddi yardım göstərmişdir. “Neftçilər” parkındakı, Yeni Günəşli “”AB və “Q” yaşayış sahələrində yürləşən “veteranlar guşələri”nin elektrik enerjisinə görə ödənişi bələdiyyənin vəsaiti hesabına həyata keçirilmişdir.
Görüşlərdə YAP-ın digər namizədləri Arif Şahmuradov, Mirvari Quliyeva, Rəşad Rzayev, İlham Mirzəyev də çıxış edərək YAP-ın seçki proqramı haqqında məlumat veriblər və sakinləri seçkidə aktiv olmağa səsləyiblər.
Qəsəbə ağsaqqalları, sakinlər vətəndaş amilinə hər zaman yüksək önəm verən Prezident İlham Əliyevə dərin təşəkkürlərini bildirərək bələdiyyə seçkilərində məhz YAP-ın namizədlərinə səs verəcəklərini vurğulayıblar.
Azinformasiya.az