Milli Məclisin bu gün keçirilən plenar iclasında Əmək Məcəlləsinə dəyişiklik edilməsi məsələsinə baxılıb.
Azinformasiya.Az xəbər verir ki, Məcəlləyə dəyişiklik uyğunlaşdırma xarakteri daşıyır. Belə ki, Məcəllədə də 28 May Müstəqillik Günü, 18 Oktyabr isə Müstəqilliyin Bərpası Günü kimi qeyd edilib.
Deputat Fazil Mustafa çıxışında Əmək Məcəlləsinə 18 Oktyabr Müstəqilliyin Bərpası Gününün qeyri-iş günü kimi salınmamasına etiraz edib: “Cəmiyyətdə də bu məsələ ilə bağlı gözləntilər var. Əmək Məcəlləsində də bununla bağlı dəyişiklik olunmalı idi”.
Deputat Əli Məsimli də həmkarının fikirlərini dəstəkləyib: “Müstəqillik Günü dəyər olduğu üçün Müstəqilliyin Bərpası da dəyərdir. Birinin dövlət, birinin peşə bayramı səviyyəsində qeyd edilməsi qəbuledilməzdir. Ola bilsin ki, bu gün qəbul edilməz. Qeyri- iş günləri sayının çox olması deyilirsə, Novruz bayramında 5 gün qeyri-iş günü var. Həmin günlər 4 günə salına bilər. Bir gün Müstəqilliyin Bərpası günü qeyri-iş günü kimi təqvimə salınmalıdır”.
***
Komitə sədri Əli Hüseynli qeyd edib ki, bu dəyişiklik texniki xarakterli olub: “Sizin çıxışlarınızdan belə başa düşülür ki, indiyə qədər dövlətimiz, xalqımız bu günə ehtiramsız yanaşıb?! Bizim etdiyimiz sadəcə adların dəyişdirilməsidir. Əli müəllim, siz 18 Oktyabrı indiyə kimi peşə bayramı kimi qəbul etmisiniz? Bu, dövlət bayramıdır”.